Ing Tocador June 20, 2006
Posted by anak in Tony Pena.trackback
ING TOCADOR
Tony Mercado Pena
ala ka mang mabye kangye
tayimik kabilyan mung bye
metung kang testigung mabye
kening malilyari king bye
kilub kebaytan kung bale!
ala kang rekla-reklamu
ibat anyang malati ku
kilub bale king arap mu
aske't lupang libu-libu
migpasanting, migpalagu!
ala kang kapagal-pagal
aldo't benging mangarakal
mulagat kang e menikal
kipkup malugud ing sukal
lub kung kasing bayat bakal!
ala kang kabulad-bulad
king arap mu mibuladlad
kakung amor sekong bilad
misapwak ampong mipadpad
melangi k'ning sawing palad!
kaybat banwang adwang pulu
migbalik ku king arapan mu
silipan kong pasibayu
ding penandit mitmung yumu
ning sintang mintang marayu!
takap-silim dakang lakwan
napun ku kekang simpanan
king magsalamin k'kung adwan
alamat nakung ingatan
e mabalbal kapilanman!
Comments»
No comments yet — be the first.