Maligosu July 28, 2006
Posted by anak in Renato B. Alzadon.add a comment
Maligosu
Renato B. Alzadon
Ining Maligosu, maniaman yang tutu,
nung ustu ya sangkap…nung ustu ya lutu;
yang maglutu sana talus ne at lisu
nung nu anti pait…ban e bisu-bisu.
Sadya na ing sangkap. Ban e ya magmintis
gisa ne keng bawang, sibuyas, kamatis
king tapi ning babing pemisikan patis…
kabulug ning bulung, takpan neng mabilis.
Yapag ne king dulang a ganap king pali
babasuk ya pa sang ibat king kawali,
nung mitambalan yang bayung single nasi
ding dungut king dulang muli langan mabsi.
Ining Maligosu, nung mapait yaman,
atyu keng maglutu….atyu keng mamangan…
makanian ya ing bie kalupang lelangan:
Nung misan, atyu ya king pait ing niaman…!
DENG O.F.W. July 28, 2006
Posted by anak in Edgardo Sale.add a comment
DENG O.F.W. (Overseas Filipino Worker)
neng Edgardo Bonus Sale
Bayung bayani ing / awus mu carela
Libu-libung milya / ing dayu ra queca
Manintun cabyayan / queraclan carela
Detang pamilya ra / lacwan dasan da la
Pibandyan da ‘Pinas / pisasali ra ngan
Misasanla pati / quegana-gana ngan
Masqui “five-six” e la / micacunung mutang
Mipunta la sa quing / marayung pagobran
Deng OFW ilang / bie ning economya
Sasagip keng bansang / e lumbug qng mapa
Queng indultung dintang / a e ra man sala
Obat ngeni ilang / mipaimburisan pa?
Mapilan carela / ngarang mengamano
Masqui atin guera / e la curul maco
Uli ning masaquit / ing bie quecatamu
E baling arapan / nanuman peligru
Nucarin la miras / perang parala ra?
Banko Central ya ing / tatangap careta
Ya pin canu iti / itang cabalwan da
Sana tutu namu / at e quenung bulsa
Capilan la caya / micabus mibulus
Detang gamat tamung / pane macagapus
Dacal na lang tutu / detang makalunus
Quening bansa tamung / sicmal ding curacut
Pane rang sasabyan / atin pang pag-asa
Dapot mate tanang / mulagat a mata
Iti e ya datang / nung e ta magobra
Galo ta na cabang / atin pangisnawa!
Inyang Kayanakan July 28, 2006
Posted by anak in Mar Franco.add a comment
Inyang Kayanakan
Mar M. Franco
July 26, 2006
Neng babalikan ku kening panimanman
Itang masayang bie kakung aralanan
Ketang panaun ning kakung kayanakan
Mamyalung tambubung ampong salikutan
Potang panaun ning masala ya�ing bulan
At maglimid bunga karetang tanaman
Kaya-kayabe ko ring kakaluguran
Mibiebie kung alang kamalit-malitan
Gagawang bidoki king gabun a pila
Balas lang tiradol pandakap dumara
At karetang denas babo ring saresa
O karetang manuk a magdumalaga
A sese nang Apu lilibad king mula
Potang ating kaming daratang bisita
Uling bistung-bistu iti ing buri ra
Ing bubukal sabo king sale gisa ra
Magpastul damulag e ku akalingwan
Ibat galingaldo anggang kayabakan
Pablasang ya iting ustung kaorasan
Laput yamung laput ing kekeng kalakian
King marimlang dikut a mengayambunan
Kaybat nang kinabsi agad ku neng dilwan
King lele taguling saka ke uluran
Katawan nang presku milis keng sarulan
Neng kauran naman aldo pamanaswe
Magdatun na ke man libutad marangle
Kayabe magobra detang siping bale
Keng patitingapun king gabun dadangle
Pablasang usu pa itang kalu-kalu
Nanuman pagobran keta king pangulu
Keng balang penganak atin makatuldu
A dapat pagobran ketang kayang agyu
Ing masayang dili potang pamamupul
Potang itang pale mapalut mibuntun
Lilung na ning kubul karin ke mitipun
Keng bandang matas ning pagobran ming gabun
Ing gintung binutil kabud medara ya
Ibalusbus da ne ring kekaming matua
Takalan at datuk keng sakung abaka
At layun iyuli sake king gareta
Bayu ya mituklip itang pamamupul
Piyugalyan mi na ing mamagpag kubul
Ikeng makipupul mapag keng miryenda
Karetang kayabe a mekipagobra
Bilang pasalamat ketang masabal da
At king grasyang kalam ning matas a banwa
Makanyan dudurut ing bie ku kanita
Ketang kayanakan king balen Pampanga
Larawan Ning Bie July 28, 2006
Posted by anak in Mar Franco.add a comment
Larawan Ning Bie
Mar M. Franco
a-25 ya ing Hulyu 2006
Ing bie ning balang melalang
anti ya waring larawan
Ing balang metung at metung
kaya ya ping gugulisan
King kayang obra maestra
lalto ing kayang pengawan
Ya ing kule ning bie keti
ning yatu tang kakarinan
Dapot ing tau neng misan
akakua nang mapapagal
Pablasang mamalagwa ya
kukunan na keng pirapal
At potang mipasawa ya
e na ne buring sundu man
King kulang na pamibalak
tabili neng mikelangan
O kapara mulingid ka
isundu mung mamintura
Uling kabud tinuknang ka
yari ne’ing obra maestra
At itang kayang kayarian
o tauli nang itsura
Ika kabud makagulis
nung malagu o matsura
Nung ding bikwal karing dalan
keka lang pagmaralunan
Pihung itang agulis mu
e ya malagung larawan
Dapot nung megari ka mung
alahas a pakintaban
King sakit na biru ning bie
malagu ya ing kalwalan
Balang metung kekatamu
myaliwa ing babalakan
Itamung balang mamili
nung nanu ing buring gawan
Ing larawan kung gugulis
e ke pa apipigurwan
Pablasang abak pa’ing oras
dakal pa ing paintungul
Anya Masaya Ka Ta July 28, 2006
Posted by anak in John Manalili.add a comment
Anya Masaya Ka Ta
John S. Manalili
1. Pasalamat ku keng Dios
Mig-adwa ku lub paglolon da ka.
Lawen mo reng puwad mu
At deng kekang butit
Asna no karagul.
Makasumami na kang lalon,
Umpak na ka pisngi.
Anggiang tumiman ka
Asna ka kalangi.
Makamurit ka dispusisyun,
Parati kang makasibangut.
Deng taliri mung dati balamu kandila
Balamu mepapa na la.
Balaku sa mapundat ka mata
Kulagat ka pala.
Deng labing mayumu, maslam la pala.
Ing malare mung pisngi
Makariri neng uman.
Ustung ala kang pustisu
Lupa ka palang aswang.
Matarling ing bosis mu,
Makalanging buntuk.
E mu na asalikut
peklatan ka pala.
Matuling ka gilagid,
Matuling ka kaladwa.
2. Balu ku mu namang
Pasalamat ka keng Dios
Migadwa ka isip
A sagutan mu ku.
Uling kalbu na ku ngeni
Ala nang ibuga
Magkasakit na kung imi.
E na makatikdo malwat,
Magkasakit mangisnawa
Keng kuku at usang.
Gagaralgal na ku bosis,
Ala ku pa king tonu.
Ustung mimilup kung sabo
Sabe-sabe keng kakung malan.
E na ku makalangut
Mengabungal na ku ipan.
Balid na kung magsalita,
Gaguti at utal,
Mag-ulyan na ku.
E ku na balu nung ninu aku
Neng misan.
3. Pero, piglolon da ka
At segutan mu ku.
Bage kata pala
Anya masaya ka ta.
4. Daramdaman mo?
Sabian Mu Na July 28, 2006
Posted by anak in Tec Sanchez-Tolosa.add a comment
|
Sabian Mu Na |
|
Nanung buri ng sabian ning kekang kataimikan Ing salu ku at balugbug makabante, makiramdam Milabas dening aldo ala ka mang sasabyan Ing pangimut, eku balu, eku makaying aintindian. Nanu kaya ing tampu mu, maghinanakit ka kako? Emu sana pabustan na kumaba ining tampuhan Lumapit ka kanaku, sinta kung pakamalan |
Requiem to the Memory of My Chosen One July 28, 2006
Posted by anak in Tec Sanchez-Tolosa.add a comment
Requiem to the Memory of My Chosen One
Tec Sanchez-Tolosa
You promised me nothing when I first beheld you
with my virgin eyes. No whispers like soft winds,
no gentle pleadings of your voice made hoarse
from speaking to the throngs who came.
My face, one in the sea of faces that stood
before you, awed, with the wisdom of your youth -
my mind, stirred from its complacency,
my heart, irretrievably captured.
Ah, the fire –
Like a light long awaited, you blazed
into the souls of us all, who took you in
like men possessed.
It was your call that awoke me from my stupor
that night, countless nights ago.
And now, many seasons after,
I see no more of you;
I have grown weary, my eyes have blurred
with nasty truths I dare not confront.
Have you grown tired, old fighter?
Have you given up the struggle for change
in this world content with itself?
Has your smoldering flame succumbed
into embers, your rhapsody droned
into a monotone?
Tell me where you hide.
Will I find you beneath the crushed dreams
of a yesterday we knew? Or behind closed doors,
one leading to another, each one sealing
and concealing the pains we shared
and the glories we will never regain?
Many came after you but few stayed true.
You see, the fight continues, with or without you.
So will I.
After all, my chosen one,
you promised me nothing
but hope on a piece of paper.
REQUIEM UKUL KENG PANALALA KU KENG KAKUNG PINILI July 28, 2006
Posted by anak in John Manalili.add a comment
REQUIEM UKUL KENG PANALALA KU KENG KAKUNG PINILI
John S. Manalili
Ala kang pengaku inyang mumunang ikit daka
Kareng birhen kung pamaglalawe. Alang bulung kalupa da reng banayad a angin.
Alang panambitan keng bosis mung mepayo
Keng pamagsalita kareng dakal a dinatang.
Ing lupa ku, metung keng dayat da reng lupang tinalakad–
Arapan mu, magmulala, keng kebiasnan na ning kekang kayanakan,
Ing isip ku, a kinimut ibat king pangakuntentu na,
Ing pusu ku, a tutung mesukul na.
Ah, ing api
Kalupa na ning salang malwat nang panenayan, lalagablab ka
Keng kilub da reng angga ming kaladua, a migpalub keka
Kalupa da reng taung meengkantu.
Ing aus mu yang ginising keng kakung panudtud.
Inyang benging ita, dakal nang benging milabas a e na abilang
At ngeni, dakal nang panaun ing milabas,
E da na ka akakit,
Mepagal na ku, melabug na mata,
Kareng mangatsurang katutwan, a e ku buring pakiarapan.
Mepagal na ka, batikan a makilaban?
Telikdan mu na ing pamaglaban keng pamagbayu
Keng yatung ini a kuntentu na keng sarili na?
Ing manyagitsit mung sindi meging
Baya nya mu, ing kekang kanta
Meging tunug nyang makatundo?
Sabian mu nung nu ka sasalikut?
Akit da ka kaya lalam da reng mengarunut nang paninap,
Ning metung a napun a abalu ta? O gulut da reng pasbul,
Ing balang metung papunta ya keng metung, ing balang metung tatakpan ne
At isasalikut ding lungkut a piyaben ta
At ding tagumpe a e tana akwang pasibayu?
Dakal la reng dintang kaibat mu, dapot ditak la mu reng meging tutu
Uling misundu ing laban, atyu ka man o ala.
Anti’y ta ku naman.
Uling kaibat na ngan nini, o pinili ku,
Ala kang pengaku
Nune pagasa mu keng metung a papil.
(John Manalili’s Kapampangan translation of “Requiem to the Memory of My Chosen One” by Tec Sanchez-Tolosa)
Pait at Yumu Ning Pamiyutus July 28, 2006
Posted by anak in Mar Franco.add a comment
Pait at Yumu Ning Pamiyutus
Mar M. Franco
July 24, 2006
E mu na sana intindyan nung e ku man bulad-bulad
Nung nanu man ing kening lub biryanan kung e na pasyag
Nanu man ing pisabi ta pinili kung e bumulad
Ban itang kamarinayan e mikalat at misalbag
Pabustan me pa mu sanang dimla ining kakung salu
E mu pa mu panenayan itang lambis ku at suyu
Nung e ra ka man lalawen lilisyan ko reng mata mu
Uling pigaganakan kung milablab ku’t mikaluku
Panupaya mal kanaku nung ala kung inatbanan
O malino sang pakibat karing kaku mu kukutang
Ala ku naman panayan a dapat mu sanang daptan
Patawad nung maybug kang kyak neng e ra ka bubularan
E mu na sana ukulan nung atin kung paginakit
Nung atin ka mang asabi kening lub ku mekayatsit
Ing mitanam kung mua keka marayu keng kakung isip
King uli mu ing pusu ku mukmukdul ya keng penandit
Bistaman ing pamiyutus mabikwal ya at e patag
Ing dalan ning pamisuyu mangasaldak ya’t lulundag
Iti e ya maging sangkan para e te pin asadsad
Ing pitali tang palsintang makabukud at bulalag
Potang dimla ne ing salu ketang bage makakaplas
Bustan mung paramdam keka ikang bukud ku mung rosas
Paniwalan mung masolu ing lugud ku keka liyag
Kapilan man e magbayu kalupa ning aldo maslag
Somewhere My Love July 28, 2006
Posted by anak in Renato B. Alzadon.add a comment
Somewhere My Love
Renato B. Alzadon
E ku balu nung nukarin, e ku balu nung kapilan
at nung makananung adle king lalam na ning likupan,
dapot ining poesia kung bignus king benging kaniglan
damdaman mu ne mu kabud, ketang e mu titinapan.
Mekad iti damdaman meng sisitsit ning mariposa
kabang tayu magpatawe king tangke ning mamung rosa;
mekad iti damdaman meng pasyuk ning angin alaya
kabang tane pakialung ing alun na ning aplaya
Mekad mipamulala ka king kalamnan ning gale ku
angga ngeni ikang laman ning diwa at ning pusu ku,
karing kakung kawatasan alang sawang sasabian ku
kapilan man bandi raka….kapilan man bandi mu ku.
Bandi mo ding kakung uma, at ding uma mu kaku la
kaku la ding kekang kaul at ding takde ku keka la,
ingatan kung mal a bandi ing misan mung pamalsinta
palsintan da ka pa mu rin….anti inyang anak kata.
At ing pamalsintang ita e kinupas….e melaun,
e mepawi, e mesintang king kekaba ning panaun,
angga ngening dirimla ne ing sinag ning gatpanapun
kaladua kung mangulilang king lingap mu magpa-ampun.
Nung matna ka king katasan at ding batwin akit mula
ikutang mu nung nanu ta ing pasabi ku karela;
at king sinag dang malamlam yang sabian dang alang sala
angga ngeni ikang laman ning diwa ku at alala.
Nung tingiran me mu sana ing tumaila na ning angin
damdaman me king sunis na ing keya ku panabilin
ulit-ulit sasabian kung anti waring panalangin
angga king tauling santungan, palsintan ku, ika mu rin.
Inya, sasamban kung Dyosa king altar ning taguimpan ku
oini ing kekang poesiang king kaniglan gagale ku
e ku balu nung kapilan, nukarin at makananu
Somewher My Love, damdaman mung angga ngeni, mal ka kaku.
*******************************************************
