Aguman Ning Amanung Kapampangan

       Amorseco
 Tony Mercado Pena

king dalanpasigan keni ku magmalun
king babo pilapil na likwan mu napun
pamangulila ku yatad da ring alun
saka sake agus king danum a susun.

maski pa kalaldo lwa ku mayuyuyut
papatak king basu na kinatmung lumut
inuman ku kaybat mapayit a pulut
akmulan ing lumbe kaku makabalut.

ing agus king ilug mamandal na ngeni
magbatyo kung sinag kapitangan bengi
manaya’t maninap bigla kang salangi
sipingnan pagkeran kakung dase bungi.

kapatak mang uran ala nang mamanggi
sana pin madilig sinta tang malangi
dilang alinlangan pipi no ring labi
bisa kung sulapo pakpak ku mepakli.

melulam ku lugud sugat melalam ya
inyang abalu ku ‘ting linukub keka
dapot e pamurin mipasno ing dimla
king pemalabal nang dimut a kalinga.

bukas makadwana langi ne ing sugat
bakas nya mung langib gulis yang kapirat
mako no ring lango mayangu no dapat
mako naka naman sinta kung masampat.

atin pang mitagan kening amor seco
dening butil bini king salu misapla
potang manabu na ing ambun king babo
tinipun kung butil kaku lang ipunla.

ining dilig ambun a manibat babo
yang makasagiwa kening amor seco
basbas sagradu ya king sintang meyango
e basibas ablas manibat king tao.

mekeni na sinta lugud ta ikabyus
salubungnan mune ing salu kung mam’yus
e mune pagkaymut mayumu mung aplus
siklaud ta’ing lugud arap altar ning D’yos!

______________________________________________