PAMANULI July 24, 2006
Posted by anak in Mar Franco.trackback
PAMANULI
(Pamun a poesya para kang Nanay Nene)
Neng: Mar M. Franco July 20, 2006
Sige Nanay ume kayu
pengari ming pakamalan
itang bie yung alang angga
kekayu neng pagumpisan
nung nukarin lumakad kong
susulud ing bayung malan
at kekayu neng tangalan
ing banwa yung pagkarinan
Lawen yu’ing makapadurut
karing kekong bayung mata
ala nang pisak a bengi
nung e aldong maligaya
detang sampaga’t alajas
kikislap gintung kalsada
at sablang malagung bageng
makasulat king Bibliya
Anti ku na mong akakit
ing timan karing lupa yu
neng maglakad ko’t magpasyal
king busal ning paraiso
at panatuan yu lang myuman
deng dati yung kaluguran
abe yong kakanta banwa
karing masayang kundiman
Bistaman asmu kasakit
ing bigla yung pamaglako
dapot iti e pa wakas
mikit tapa balang aldo
kaluguran ming pengari
pihung liliwan da kayu
king kalam ning Ginung Dios
tula mi ing panuli yu.
Dakal a salamat keng pamagdikil mung espasyu kening makabukud a poesyang lelang ku para keng paglako ning kaluguran kung katwangan.
Luid ka! Luid ya ing amanung siswan!
Ing biseru