Aguman Ning Amanung Kapampangan

NGENING MEKO NAKA
(neng Tony Mercado Peña)

marimla ing sibul ning angin
manyaliksik, magsumiksik
angga karing sepu’t yamut
ning kakung panalangin….

na sana e muku lalakwan
dapot bitis kung meniklaud
e parin migsilbing minagwanta
king kekang pamaglako.

ngening meko naka
e daka tangisan
ining mitagan sikanan
karing takde kung manangle
panikwanan kung kumulkul
metung malwalas a kutkutan.

yang maging karinan
ning pamangalingwan
karin ko idatuk masuksuk
tambunan malalam gabun …

ding langib ning napun
e na sinagiwang pasibayu
ding mélanging patak luwa
e milamnan timan kapilanman
ding mepiping siguk 
nagtal ning pangulila.

ding apis linislis ning lablab
meging aplus ginalus ning dimla
ding bining amorseco
e na medilig ambun ulap
ding pira-pirasung paninap
e na mibayit kapilan pa man.

pekamalalam dili kung ikutkut
ya’ing mapait at mabye katutwan
lidlad ning sulat mung likwan
king babo kung ulunan
sinabi mung daretsanan
aliwa aku ing sinta mu
manibat pa king ibat.