Lihim Ning Pamanyulat Kung Poesia August 26, 2006
Posted by anak in Renato B. Alzadon.add a comment
Lihim Ning Pamanyulat Kung Poesia
Neng Renato B. Alzadon
Poeta Princepe/Poeta Laureado
Metung pung sankan na inya kaku mayan ing pamanyulat pu karing kawatasan, ya itang atin ku pung pamamaralan a pagpamye ku pu nung buri yeng kunan.
Ing paralan ku pung gagawang poesia, ya ing susulat keng balamu mo prosa. Inia, ing agus ning diwa yang kabas na yang agus ning batis kabang dudulung ya.
Menasa pu karing kanakung sinulat, subali karetang misulat nang malwat, makayan la pin pu pamilapatlapat. Inya, atmu no pu kalagwang misulat.
Pangilagan ku pu, nung agawa ku rin, itang magkulang la king pangatiririn. Kesa king dinan keng pasalungkit ing “tin”, bilugan ku ne pu king katayang “atin”.
Nung panuliran pu, ding kakung poesia prosa la pin tutu —atyu la keng rima. Metung pa, bistaman prosa lang talaga, makasukad no man bilang deng silaba.
Inya kareta pung mangutang nung nanu ing tagle nang birtud ning plumang talan ku, oyan pu, ya pin yan ing kakung sekretu a pagpamye libri kareng kabalen ku.
Ngening balu yune at lubus atalus ing lihim ning rimang pane-pane agus, agkatan da ko pu, tuki kong tagusgus king batis ning diwang mapinu lagusgus…!
*********************************************************
BAYAD YANG BUU August 26, 2006
Posted by anak in Mar Franco.add a comment
BAYAD YANG BUU
Mar M. Franco
Ating metung a baintaung malapit na mung mayari
keng pagaralan nang kursu, at uling atinan o
maki-agyu ya ing karelang pamilya kompyansa yang
nanu man ing pamitan nang regalu kang Tata na agyu
nang ibie niti kaya. Anya kabud misabi lang mitata
sinabi na at pemitan ing buri nang regalu pablasang
malyari neng ipagmaragul ning kayang Tata uling
mayari ya keng kursu na bilang “cumlaude”. Ing buri
nang regalu metung yang masanting a kotsi a pane
nang lalawen neng lalabas ya ketang “car dealer”
neng maglakad yang papunta keng koleyung pipagaralan
na.
Kabang lalapit ing aldo ning pamagyari na, ing
baintau magumasid ya keng galo nang Tata na at
manintun yang sinyalis nung seli na ne ing pamitan
nang regalu. Anyang miras ing abak ning kayaldon
ning “graduation ceremony” ing Tata inaus ne ing
baintau keng silid a nung nukarin ya madalas
mamasang libru. Ing Tata ngana, “Buri kung abalu mu
ing kaluguran daka at eku balu nung nu anti ing
binye mung kuswelu kanaku bilang biasa at mapinu
ugaling penganak at uli na niti pagmaragul daka”.
Kaibat nang sinabi iti inabut ne ning Tata king
baintau ing masanting a pangabalut a kahun regalu.
Bistaman medyu meyala yang gana ing baintau king
tinggap nang regalu, agad neng biklat at mamirapal
neng pengisi ing masanting a pangabalut a kahun at
ikit na ing laman na metung yang masanting a libru a
“leather bound”. Kabud abitasa na iti, mimua yang
sinumbat keng Tata na at ngana, “Keng karakal yu
kwalta, libru yamu ing regalu yu kanako?” kaibat
piragli neng meko at likwan ne ing regalu.
Milabas ing mapilan banwa, ing baintau meging
matagumpe ya keng pamagnegosyo keng marayung lugal.
Mikamasanting yang bale, miyaliwang modelung kotsi
at masayang pamilya. Bistaman sagana ya keng
miyaliwang bage asasali na ning kwalta, balamu atin
pa mu rin kulang keng bie na at e kumpletu ing saya
na. Kanyan ne aganaka ing kayang Tata a e na pa ikit
pasibayu manibat anyang mayari yang koleyu. Dapot,
bayu na pa alingunan ing pamanuli na, tinanggap yang
telegramang mamalitang ing Tata na mete ne at
kailangan nang muling agad uling pepamana na ngan
kaya ing melakwan a pibandian.
Karatang na king bale nang Tata na, lalu yang
melungkut uling aganaka na ing tauli rang pisabing
mitata e masanting. Milukuban yang lungkut ing
pilubluban na kabud aisip na ing gewa nang pamanabug
at pamagdabug kang Tata na. Piragli nang pengalkal
ing gamit at miyaliwang papeles nang Tata na ketang
silid nang pipamasan at karin ikit ne ing bayung
librung kinatmu nang alikabuk a makabili king babo
lamesa nung makananu neng likwan kanitang tebugan ne
ing Tata na. Kabang kikiak ya, biklat ne ing libru
at memasa ya. Anyang maglipat yang bulung keng
pamamasa na, menabu ya ing susi ning kotsi keng
sobring makapakat keng tauli nang bulung ning libru.
Ing sobri atin yang lagyu ning “car dealer” a nung
nukarin ne madalas sisilipan itang pagnasan nang
kotsi kanitang bayu ing pamagyari nang koleyu. Ing
tatak ning sobring dukanan ning susi makasulat ing
aldo ning kayang pamagyari at ing katayang “PAID IN
FULL”
PIBULEBULAYAN:
Bilang penganak a maniwalang atin Mayupayang
Guinung Miglalang keng sabla, ing kutang kekatamu
kapatad… makatapilan ukdu tayang akakalingwan ing
Mayupaya uling deng grasyang pangadian tamu Kaya e
Na la babie kekatamu keng itsura o pangabalut nung
makananu tala buring tanggapan?
Anya Kakanyan La August 25, 2006
Posted by anak in Mar Franco.add a comment
Anya Kakanyan La
Neng Mar Franco
Aug 25, 2006
1.
Nya migagaga la detang miyasawa
Ing pali dang buntuk e ra ayagwanta
Lalaking dusupil pilit manintun ya
Nung nanung apangan keng babo lamesa
Dapot ing babai ala yang ayampang
Agya sang nasi mu keng babo ning dulang
Uling ing lalaki ala yang intregang
Ditak mu man kwaltang panyaling pamangan
Aldoldo ning bie ra pane kabuysitan
Almusal, paugtuan angga nang apunan
Ing pisusuluan da purus kabugnutan
Karas na ning bengi kawani pagkeran
2.
Nya migagaga la detang politiko
Mipamasibas lang burak ampong kanyo
Pididibatian da nung ninung menako
Uling alang yari karetang proyekto
Keng alang patugut pamipangalamus
Kalulung memalen keng buntuk gagamus
Ala lang akakit kapilan mikabus
Ketang kabilyan dang mangaplas a dungus
Ustung deng memalen e da asukmaman
Ing daranasan dang pane nang danupan
At deng politiko daragul la atyan
Libutad na la ren gulisak king dalan
3.
Tutung makarine potang itang tau
Ugaling animal ing papakit tamu
Ala tang keliwan kareng pusa’t asu
Agyang alang sangkan mibubungil tamu
Nung bakit ing tau makanyan ya asal
Alang pamyaliwa karetang animal
Uli na ning IMBUT at DIRYAng mimiral
Ing nanu mang bage magi yang makamal
“Bahala Na” August 25, 2006
Posted by anak in Renato B. Alzadon.add a comment
“Bahala Na”
Neng Renato B. Alzadon
Yang salitang “Bahala Na” nanu ya ta buring sabian…,
ba’t yang parating laman na ning asbuk yu, kayanakan…?
Nung e ye pa lubus talus itang tune nang kalamnan
e kayu buga-bugasuk a magsalitang makanyan;
ban keta mirinan kayung ditak a pamamatyawan
king bie nang delanan Grady subukan yung manandawan,
Uling king bili nang Grady lubus na neng aintindyan
ing salitang “Bahala na” nung nanu ya kabaldugan…..
Kanitang kayanakan na anti ngeni ing edad yu
ding kaparang kayanakan inagkat deng sigarilyu
e ya sana bisang sindi, magkang atin magkanulu
at abalu nang tatang na, pasakab neng siguradu;
dapot king kapipilit da kalupang mamayintau
sinindi ya. ” Bahala Na”, ngana na mung mengamanu.
ing misan a “Bahala Na” meulit yang pasibayu
anga king maguing bihag ne niting makagunang bisyu.
Inyang atyu king Kolehyo detang kakaluguran na
ayagyag deng minum alak ampon sinding Marijuana
O’ eya mo sana bisa uling pigaganakan na
magkulangan ya king perang gamit king pamag-aral na;
dapot kening kapipilit da ding kayang kabarkada
“Bahala na” ngana namu, mekitulad ya karela
angga king panyubukan na itang miyaliwang droga
mesira ya pag-aral…. sinira ning “Bahala Na”..!
Inyang ala neng pamayad king upahan nang tuknangan
at ala neng pamisali o isanlang kasangkapan,
kesa king muli ya bale at manyad kapatawaran
karing pengaring ginastus ban magkamit yang kabyasnan,
pinlli na ing maglayas at lito-lito king dalan
a mabibie anting pusang mangalkal keng basurahan.
at ding lalam da ding tete ilang gewa nang tudturan
“Bahala Na” ngana namu, king miras nang kapalaran.
At mika-kaluguran yang kalupa nang sulmuk-sulmuk
a tiru deng pamanyabat, pamanyamsam, pamandukut,
at potang mika-pera la yanang mumuna rang imbut
ing makasali lang agad king drogang makadayukduk;
ing metung a heringilyang liwas-liwas dang panusuk
e ra ne lilinisan man kabud da nya mu pakutkut
agyang ‘tin marinat daya a karela makasamut
“Bahala Na” nganang Grady, king gamat ya pepatusuk.
At ketang bie nang makanian kanita ne akabasa
ing babaying pangayamnan a miglayas kalupa na,
at king lalam na ning tete king delumduman ning banua
ing aligwat na ning laman ya ing migbabo karela,
bistaman ing babaying yan sinabi nang pepa-una
king darala ne ing salut ning sakit a makayawa
king pangayuyut nang Grady ene ginamit mang goma
migpanyud ne mu king tula ngana namu: “Bahala na”.
At misan darala’na ning king droga pamangailangan
kayabe de detang linub king Botika Ning Balayan,
at kanyan no masaluput karetang Makapalyaryan
at misaldak ya Y Grady king kilub na ning sukulan
at inyang ing kayang sala malitis na king ukuman
miyatulan yang pa-ulu king sakit nang panamdaman,
Oyan makaniyan ya anyu ing metungge pamahalan
laksang libung “Bahala Na” bayu naka apansinan.
King panga-ulu nang Grady sinubling pakakalale
itang sadya nang tetagan ning diwa na’t pamibule
nung mikasikanan ya man king ban keta isakwil ne
itang drogang makayuyut a sinintang king kayang bie,
dapot ing salut nang ikua king babaying akalele
alang matampang panulu…. sentensya yang pangamate…!
Oyan ing meguing bunga na, at ngeni pupupulan ne
ning salitang “Bahala Na” ulit-ulit nang siglawe.
Ngening balu nang e maglwat mikit nala ning Guinu na
sinisyan nang anggang binit ing anggang depat nang sala,
ene buring mipalamang ing ingatan nang kaladua
a manabu king impyerno ning alan’anggang parusa,
pangaras king kakarinan a sidya ning Dios king banua
manintun yang kasigurwan kabang atyu pa ing bie na,
itang kayang kapanayan king bie na ning alan’angga
e na ne buring panalig king salitang “Bahala Na”!
Oyan, mal kung kayanakan, makanyan ya kabaldugan
ing salitang “Bahala Na” a pane yung sasambitlan,
iti…., kararaptanan yang dimut king kapamalakan
at mamunga yang e mayap karing aldo payntungulan;
ing ipakisabi ku mu bayu ye sa gamitan yan
ing bie nang delanan Grady panikwanan yeng ganakan;
uling ya inyang ati ne king arap nang kamatayan
ing salitang “Bahala Na” ene buring sambitlan man .
Karing Kayanakan Ning Balen Ku August 25, 2006
Posted by anak in Renato B. Alzadon.add a comment
Karing Kayanakan Ning Balen Ku
Neng: Renato B. Alzadon
Mal kung kayanakan,
matna ka. Masdan me ing kekang bandila,
layun mong sulyapan,
king aldo nang maslag ding walu nang yata;
walung lalawigan,
matning ginulisak migdulap king laya
na ning indung tibuan,
bayang mangapatlud pangatanikala.
O’ ing Kapampangan,
metung ya karetang maningning a sala
uling ing kalayan,
karing kapampangan matimbang yang bina.
Luid ka kayanakan,
ika ing migmana king guintung kalayan—
yang kalayan a yan
inablian deng daya ding bayani tang nuan!
Bilang kayablasan,
ing mininining nang yatang kapampangan;
ali me pabustan
ing mangulimlim ya maslag nang dangalan;
ban king kapilan man
ing yata nang guintu e ya mipampanan;
e mu kakalinguan
ing kapampangan ka king diwa at laman.
Bilang kapampangan,
atin kang amanung binie nang Bathala.
Bilang kapampangan,
dapat meng luguran ing kekang salita.
Bilang kapampangan,
ing kekang amanu sukat meng pamingua.
Bilang Kapampangan,
tungkul mung sumaup bayang misaplala.
Bilang kapampangan,
ipagmaragul mu babo ning masala.
Bilang kapampangan,
mangapampangan ka arapan ding malda..
Inia, kayanakan
E mu ipaintulut kulimlim ya kule,
Pangakapampangan,
a karing uyat mu dayang mangulate;
ing kekang kalayan
yapse ning dila mu ing buri nang yapse
e me susuku yan
maski kenu paman kabang atin kang bie;
Nung isuku me yan,
at ing amanu mu banke yang mipase,
ing kekang dangalan,
bilang kapampangan, kayagnan neng mete!
Ot kakanyan Kayu…? August 25, 2006
Posted by anak in Renato B. Alzadon.add a comment
Ot kakanyan Kayu…?
Basultu neng Renato B. Alzadon
1.
Migaga no naman dening miyasawa
alang kwentang bague ing pigagagan da
mangamulagat lang mangalare mata;
nanung ugali yan…? O’bat kakanyan la….?
Ini nang anak dang tahimik manalbe
yang makukulaming milululun kile
“patugut nakayo”, nganang maririne
“ot eko misabi ketang masalese.”
“Akakalinguan yung miyasawa kayu
ing nanu man bague dapat pisabyan yu
atna pu kanawang, ot kakanyan kayu
pakyapusan yu la politiku tamu.”
2.
Migaga no naman detang politiko
mipanataki la kilub ning aldo’ldo
ala lang patugut king katatabulyo
o’bat kakanyan la…? Atmo kanong lalto…!
King ala rang tuknang a pamangalamus
ding memalen mismu ilang makalunus
“patugut nakayo”, ngarang mangapayus
“ot eyu salesen ing kekong pamyutus.”
“Akakalinguan yung tau kayung mapya
inya sa’t ikayung mipuk king upaya;
ot kakanyan kayu….? Kanawang na ata,
ilang apusan yu deng asu at pusa..
3.
Ding asu at pusa oretang mipate
mipangalamus la, atmu na la kaynge
karing kasangkapan a mangabalugse
sinapak yang kalat ing kilub ning bale.
Ing lorung manalbe sibyanan no kanyan
“patugut na kayo keng gagawan yung yan
karitak a bague, ot eyu pisabyan
padalan yung agad keng pamibungilan.”
Akakalinguan yo king aliwa tamu
animal ta abe, loro, pusa’t asu,
mibalak ko sana, ot kakanyan kayu
pakyapusan yu la ugali deng tau….!
Karing Kayanib na ning Aguman Kapampangan August 25, 2006
Posted by anak in Renato B. Alzadon.add a comment
Karing Kayanib na ning Aguman Kapampangan
Neng: Renato B. Alzadon
Poeta Princepe/Poeta Laureado
Karapatdapat mu, antimong makudta,
ing dalitanan ku ing mayap a gawa;
uling nung yang mayap eya masambitla
sulu ya mo waring makatakap sala.
Dapat sa yang bague masampat, malagu
e ya makasuklub kilub ning kulumbu
dapat yang milantad a masalang sulu
king balang matangal ding sinag nang guintu.
Ing mayap a dapat a sukat sambitlan
ya ing pami-usig at pamitambayan
ding tau Oregon, lalam ning Aguman
a pemansagan dang Northwest Kapampangan.
Karin ikit ku nung nanu la pamyutus
sapning kapampangan….manayun, ma-ayus;
itang panugaling, mayaga, malamyus
e kakating sibul….batis yang mamagus.
O’ ding Kapampangan, karin, dimdam ku la
alang pamikunut mangapampangan la
at king kakung masid ipagmaragul da
king meto-ketawan king kapampangan la.
O’ wa kasampat na, amanu yang budni
ing ibibigkas da ding karelang labi
at ing amanung yan yang pawagang matni
king kapampangan lang marangal a dayi.
Pati ing aral na ning Paring mig-misa
atmu ne kasampat…mengapampangan ya;
uling kapampangan la ding amanu na
maniaman dong tinggap ding mekipagmisa..
Ing balang masdan ku kapampangan anyu
ing makapaligid kapampangan samyu
pati na pamangan kapampangan lutu
uling kapampangan la tibuk ding pusu.
Pamiaduangan da dalise at lusuk
tapat lang gagalo karing balang tutuk;
at gagalangan de ing mal dang pamuntuk
Guinung Ernie Turlang pekapun dang pinuk.
Nung balang aguman makanyan langan sa
pangakapampangan ipalkas deng kusa
ing amanu tamung sisuan a salita
e malyaring mate….mie ya kabang-kaba!
DENG BALEN A KAPAMPANGAN August 25, 2006
Posted by anak in Ernie Turla.add a comment
DENG BALEN A KAPAMPANGAN
lyrics by Ernie C. Turla
(tune: Totoy Bato’s “Macalunus-lunus” or any basulto
tune,incl. Atin Cu Pung Singsing, Aniang Malati Cu)
Maluat ta nong buring / myuman apasialan
Deng anggang sacup ning / labuad Capampangan
Ania ngeni-ngeni / ing quecatang gawan
Saque tang Victory / libutan tala ngan.
Magumpisa tamu / qng balen ning Sexmoan
Carin qng paroba, / busal ning cailugan
Carin la macucua / reng dacal a asan
Picabaluan yaiti / careng cayang plaisdan.
Dalaquit tang aduang / ilug qng albugan
Ing balen ning Lubao / ya’ing quecatang dasnan
Quen ne mang atbu’iti / at palayan dacal
Carin ya misapuac / Dadong Macapagal.
Magpasulung tamu / banda paralaya
Ing dasnan tang balen / ing masayang Guagua
Carin ya tubu ing / prumerung cardinal
Y Rufino Santos / obispung marangal.
Artistang Rogelio / idolo ring malda
At Gloria Arroyo – anac no ning Baba;
Yuzon, Tolentino – poetang balita
At Senador Puyat – tubu la ngan Wawa.
Calagpas ta Betis / miras ta Bacolor
Balen de reng watas / a matas a balor
Crisostomo Soto / at Felix Galura
Ila ring taniag nang / poetang macudta.
Ing Baculud ya ing / Athens ning Pampanga
Ing minunang diling / “trade school” carin ya
Meguing capital ne / ning quecatang bansa
Iniang simsam de reng / British ing Menila.
Ing tutuquing balen / ya ing San Fernando
Ya ing capital na / ning probincia tamu
Meguing capital nia / namang Aguinaldu
Caibat ning Malolos – bigsac ding ‘Mercanu.
Ciudad San Fernando / sicat ya neng Pascu
Uling deng parul nang / pasigla queng yatu
At ustung Maleldo / ya ing cabalitan
Careng papapacu / queng curus mu naman.
Balian ne ning martir / Jose Abad Santus
Lugud na queng bansa / daya na minagus
Balian ne ning central – ya ing Pasudeco
Gagawang asucal / neng aldo cacabio.
Magbanda tang wanan / banda qng aslagan
Balen Santo Tomas / quecatang labasnan
Dasnan yang Apalit / carin ya’ing Sulipan
Ya ing cucina ning / lutung Kapampangan.
Magpabalag tamu / banda qng mauli
Miras ta Masantol / at qng Macabebe
Pugad do reng dacal / diling beteranu
Na ning America – detang pensionadu.
Lahi lang matapang / matun queng labanan
Ilang pengara ra / ri Raha Soliman
At careng Castila / macanian mu naman
Pequiguera rala / isla cabilugan.
Magbalic ta ngeni / papunta qng babo:
Minalin, San Simon / San Luis at Mexico
Iti lugal de ri / Luis Taruc at Hizon
Metung a heneral / na ning rebolucion.
Caibat ing Sta. Ana / cambe ning Arayat
Calele ning bunduc / taniag queng alamat
Catalindiquingan / ya pin ing Candaba
Balian nang Gallardo / sicat a poeta.
Ngeni lundag tamung / marayung-marayu
Dane ning Zambales / Bunduc Pinatubu
Baryu Sta. Cruz / lunsut ta Florida
E la micanlaut / balen Sta. Rita.
Carin ya ing Basa / papunta qng Porac
Sumulung tang maluat / at miras ta qng Clark
Air Base ne canita / bansang America
Dapot ngeni naman / “economic zone” ya.
Sulapo tang norte / ing Tarlac yang dasnan
Peca pangulu ning / labuad Kapampangan
Carin ya ing taniag / Hacienda Luisita
Anti murin ing park / nang Maria Cristina.
Magpabalag tamung / patililis canu
Miras ta Concepcion / balen nang Aquino
Lumipat tang ilug / miras ta Magalang
Sale ring poetang / misna qng guelingan
Sumulung tang wanan / layun tayang dasnan
Ciudad ning Angeles / centru ning cabiasnan
Sandalan ding pantas / pugad ning casayan,
Taguimpan ne ngeni / ning balen tang tibuan!
Magbalic tang norte / Dau, yang tuntunan
Mabalacat na iti / at caibat na’ing Bamban
Calagpas ta carin / ing Capas yang dasnan
Carin ya’ing O’Donnel / “Death March” cayangganan
Carin ya mibait / Renato Alzadon
Bantug nang poeta / ning Amanung Sisuan
Dala me queng prosa / dala me queng canta
Anting talasulat / easy-easy caya
Ya’ing dalo pandangal / ibat ya Maryland
Pagmaragul ta ing / cayang pamaniatang
Maldang maquiramdam / ana ticdo ta ngan
Pasaganan tayang / matning palacpacan!
Ninoy Aquino August 25, 2006
Posted by anak in Renato B. Alzadon.add a comment
Ninoy Aquino
Neng:Renato B. Alzadon
Ginulis antimong kildap a miglate
Ing balitang baryung biglang mengulate:
Y Ninoy Aquino tane makarate
King karsel nang maskup, malapit nyang mate!
Malapit nyang mate, mapatlud inawa
Ing talapamingua na ning demokrasya;
Gobyernung Dictador uling titulan na
Dekap de at kilung king bayang magdusa.
Uyab na pin nitang dusang milalalu
Inia makanian yang pane saskup salu;
Ngara ding linawe tin yang sakit pusu
Alang makasabing akua nang milapsu.
Milapsu ya man mo king sakit a sutil
Ala nemang ligtas karing paka-baril;
Ing korte Militar bininyag neng taksil
A dapat mabite king depat nang sawil!
Subali kaniti, maina ne katawan
Pabulan na maiguit ing eya mamangan;
Antimong protesta king kapanyupilan
Tintu na king lub na king ali ne mangan!
Kealimbawa na magmalun a ayup
Bisa yang milaya king jaulang maskup;
Bisa yang dalakit king bayung lupalup
Karin, nung nu ing Dios yang Aring sasakup.
O king kaladua na ninung magpalaya?
Ing saket ? Ing bite ? o ing danup kaya?
Maski sanu karen ngaring mapanula
Y Ninoy mate yang alang panga-kabla.
Ing akalinguan da dening mapanunggue
king ing kamatayan misteryu yang bague;
kapilan? Nukarin? Makananung adle?
Ing Guinung Miglalang ya mung makimale.
Oini pin ing tanda: mekabulad na mu
Mipaintulutan yang paulu ne pamu;
Ken ne peka-lasan ing malating subu
Kena na king labi ning mutyang kasuyu.
At pepaulu ya king aliwang bansa
Migdatun ya Boston angga king sikan ya;
kabud menumbalik ing sadyang gilas na
Mine yang minuli king bansang tibuan na.
King labuad nang tibuan ustu yang midalpak
Iniang barilan de ding alang patawak;
King pangamate na balen ya ing kiniak,
Balen yang mig-alsang linaban king dawak.
Bakit eya mete king karsel a maskup?
Bakit ene pete ning salu nang saskup?
Bakit ere pete dening mapanyakup?
Bakit ene pete ning milalung danup?
Atin Dios! Atin Dios! Ing Dios Ya ing Ari
Ya at Ya mu kabud mipamintuan buri.
Mekad kaburian na king ing taung budni
Y Ninoy Aquino, mate yang bayani.
NINU Y NINOY August 25, 2006
Posted by anak in Tony Pena.1 comment so far
NINU Y NINOY
(Neng Tony Mercado Peña)
libutad rehas kalwangnan
mikulung ka’t miyatulan
king paratang kasalanan
e mu gewa kapilanman!
e mu man ikwang mitalpak
king marimlang dalan tarmak
sinadya ra kang sinalmak
ding isip marok’t talamak!
piklud de man inawa mu
pete de man katawan mu
manatiling mabye pa mu
karing balen kaladwa mu!
matalik mung kapanwalan
ing rosaryu yang santungan
akbung baril ning kalaban
siklaud yapin balu tangan!
king tahimik mung karinan
milyun konfeti mumuran
pasalamat sasaluran
ing kekang bye pupugayan!
dapot e ya pa mikutkut
bangke na ning mandurukut
malulupus madadamput
king sarili nang bangungut!
lulupa yapin ing bye mu
king Ginu tang Jesu Kristu
dinaun me bugtung bye mu
mikabus la sa ring tau!
