NINU Y NINOY
  (Neng Tony Mercado Peña)

  libutad rehas kalwangnan
  mikulung ka’t miyatulan  
  king paratang kasalanan  
  e mu gewa kapilanman!   

  e mu man ikwang mitalpak    
  king marimlang dalan tarmak
  sinadya ra kang sinalmak        
  ding isip marok’t talamak!      

  piklud de man inawa mu    
  pete de man katawan mu  
  manatiling mabye pa mu  
  karing balen kaladwa mu! 

  matalik mung kapanwalan  
  ing rosaryu yang santungan
  akbung baril ning kalaban   
  siklaud yapin balu tangan!  

  king tahimik mung karinan
  milyun konfeti mumuran  
  pasalamat sasaluran            
  ing kekang bye pupugayan!

  dapot e ya pa mikutkut        
  bangke na ning mandurukut
  malulupus madadamput     
  king sarili nang bangungut!

  lulupa yapin ing bye mu     
  king  Ginu tang Jesu Kristu
  dinaun me bugtung bye mu
  mikabus la sa ring tau!         

NGENING MEKO NAKA
(neng Tony Mercado Peña)

marimla ing sibul ning angin
manyaliksik, magsumiksik
angga karing sepu’t yamut
ning kakung panalangin….

na sana e muku lalakwan
dapot bitis kung meniklaud
e parin migsilbing minagwanta
king kekang pamaglako.

ngening meko naka
e daka tangisan
ining mitagan sikanan
karing takde kung manangle
panikwanan kung kumulkul
metung malwalas a kutkutan.

yang maging karinan
ning pamangalingwan
karin ko idatuk masuksuk
tambunan malalam gabun …

ding langib ning napun
e na sinagiwang pasibayu
ding mélanging patak luwa
e milamnan timan kapilanman
ding mepiping siguk 
nagtal ning pangulila.

ding apis linislis ning lablab
meging aplus ginalus ning dimla
ding bining amorseco
e na medilig ambun ulap
ding pira-pirasung paninap
e na mibayit kapilan pa man.

pekamalalam dili kung ikutkut
ya’ing mapait at mabye katutwan
lidlad ning sulat mung likwan
king babo kung ulunan
sinabi mung daretsanan
aliwa aku ing sinta mu
manibat pa king ibat.

       Amorseco
 Tony Mercado Pena

king dalanpasigan keni ku magmalun
king babo pilapil na likwan mu napun
pamangulila ku yatad da ring alun
saka sake agus king danum a susun.

maski pa kalaldo lwa ku mayuyuyut
papatak king basu na kinatmung lumut
inuman ku kaybat mapayit a pulut
akmulan ing lumbe kaku makabalut.

ing agus king ilug mamandal na ngeni
magbatyo kung sinag kapitangan bengi
manaya’t maninap bigla kang salangi
sipingnan pagkeran kakung dase bungi.

kapatak mang uran ala nang mamanggi
sana pin madilig sinta tang malangi
dilang alinlangan pipi no ring labi
bisa kung sulapo pakpak ku mepakli.

melulam ku lugud sugat melalam ya
inyang abalu ku ‘ting linukub keka
dapot e pamurin mipasno ing dimla
king pemalabal nang dimut a kalinga.

bukas makadwana langi ne ing sugat
bakas nya mung langib gulis yang kapirat
mako no ring lango mayangu no dapat
mako naka naman sinta kung masampat.

atin pang mitagan kening amor seco
dening butil bini king salu misapla
potang manabu na ing ambun king babo
tinipun kung butil kaku lang ipunla.

ining dilig ambun a manibat babo
yang makasagiwa kening amor seco
basbas sagradu ya king sintang meyango
e basibas ablas manibat king tao.

mekeni na sinta lugud ta ikabyus
salubungnan mune ing salu kung mam’yus
e mune pagkaymut mayumu mung aplus
siklaud ta’ing lugud arap altar ning D’yos!

______________________________________________

ING TOCADOR  

Tony Mercado Pena

 Kaplas
Tony Mercado Pena

Click here to listen  

mataram ya kaplas
ing kekang pamaglako
likwan mukung alang paalam.

lalu yang lalalam
ining ulilang sugat
abang kakapkapan kong pasibayu
ding bakas mu king balas
ketang pampang
ning dalanpasigan
nung nukarin
ing kabilugan bengi
e mebisang metudtud.

migkera, misiping kata
matalik meng sinulud
singsing kung masinup
tanda ning pamiyagum
ding adwang misingirug
e da pin alingad
misaglulung alun king ilug
ing malugud tang pamibuklud.

masalang aslag alipatpat
anting korona palibut palapat
kekata binalabal, nulasan
abang ala kung sawang naplusan
labi mung asmu lambut
banabanayad mibusni talukab
dininan dalan ing kimut at lablab
ding labi kung mangulaput.

'nyang tuluyan yang masambut
magpatagusgus ing bengi
masaspak ne ing munag!

KALINGWAN DA NAKA
Tony Mercado Pena

napun …
lume kang nagud lawe
umpisa king sepu ning bitis
angga king sepu ning buwak
makakalale, alang kangye
maski ining duldul ning salu
ing saldak na malumene!
 

sinitsit yang migpumilit
pepasapupu ing lisangan
ning makabang gatpanapun
sinalilung king kandungan
ning manaplus mung timan!

e binang miglambat
bayu ya melabal ing silim
uyung nang Kupidu
inaptas no’t sinintas
ding mikalugud tang pusu!

ngeni …
kasaguli, bilis kislap-kurap
mababating ka king kakung arapan
mamapun ne ing napun
matudtud ne ing bengi
malalagas no talulut
ding sampagang kampuput
mapapayus no paswit
ding denas king jardin
malalam na kati ing danum
misasalbag ing dulum!

bukas …
tagusgus ing masikan a uran
magsadya kung salubungan
ing mamalimpuyung agus
kanita wasan malinis ing bakas
ning kekang merimlang kaul
ding galus ning kekang aplus!

kaybat …
sabe kung magpatiyanud
kusang malugud malumud
muli karin king dayat-malat
king malwalas nang sapupunan
yang matayimik kung santungan!

Tony Mercado Peña
http://bungasasa.bravehost.com/

Bibingka Nang Kaka 
Neng Tony Pena   

 Ing Mataram A Laram   

uling sabi mu kamata kang balawe 
tutu pin pala ing mataram ka lawe
mupin makawale la ampon makalele
metung makabaldug dane yang albugan
kadwa makaukyat banda yang aslagan!   

pepanwalan mu ku matingkad ka bikas
karing kekang sulat pane makabigkas
patune pa mu rin ketang larawan mung
sayad ning palda mu anggang bukung-bukung
ngening mikit kata tutu kang marikit
kekang butit pala ilang mididikit!

kaku sinabi mu kutis kang labanus
o Kaka, o Kaka  makalunus-lunus
e mu ne bubugnus ing taram ning laram
kaku yang a taruk dila mung malalam
kasing gaspang pala ning balat ning pasas
kutis mung mengaliskis saka memalas!

pipilitan mu kung mamanikan kusa
ban keta ipakit kekang mariposa                               
libutad ning albug karimlan at uran
pekikwanan kung mukyat king kekang eran
kabusni ning pasbul ikwa kung mebigla 
kekang mariposa kambubulag ya p'la!

/Tony Mercado Pena

Ing Amanung Sisuan 

e ku ne kalingwan ing Amanung Sisuan
kaku yang amana king Indung ibatan
kambe keng mibait keti king masala
mabilug a yatu kaku yang siwala. 

ing Amanung Sisuan amanu yang ibat
nunung Astronesyan lipat dayat malat
libung banwang milabas manibat inyang
ing bankang maragul sinanglad yang pampang.

Pampanga  ing lagyu na ngeni ning Balen
karing bayung anak ya ing bayung Belen
Kapampangan ing aus karing memalen
ing bansag karela yapin ing Kabalen.

”Mekeni Abe” pakyapusan dang sabyan
kaluguran tamung e man Kapampangan
balu dya mu namang tigtigan gitara
”Atin Ku Pung Singsing” a alang kapara.

o Kaka, o Kaka balu mu na ngeni
ing Amanung Sisuan mabye yang parati
apse yang amanu, sisuan ya king Indu
angus ya king gabun, 'bat karing ninunu.

kakung kabalen, kaputul ku't kapatad
agyang nukarin katang kalma mipadpad
keti babo yatu, malapit marayu
ing Kapampangan makamal yang amanu.

makalingwan ya mu ing Amanung Sisuan
nung Indung ibatan e ne Kapampangan
ing bayung bait susuan bayung amanu   
Tagalug, Bikul, Bisaya, Amerkanu.

makanyan mu naman nung Igpang ibatan
digpa ya't tinuknang king marayung lugal
bugsu ning bayung amanung makaluwal
bunsung anak matda ing Amanung Sisuan.

adwan ku karing Igpa't Indung ibatan
king marayung lugal a nu la mipadpad     
pangadi kekayu ginu kung kapatad
luguran yeng matalik ing Amanung Sisuan.

e kune paglibe amanu kung sisuan
maski karing gintu't perlas a timpukan
palamuti lamung kikislap lalawen
ing Amanung Sisuan aslag ne ning Balen.

/Tony Pena