|
"BUNGA SASA" ing pamagat ning libretang sinulat ku
pauli na ning aku anak kung mibait Sasmuan (Sasa-muan)
na dati mas balu o kilala ya king awus a Sexmoan.
Inyang malati ku,
maski nukarin manakit ku sasa.
King pampang da ring ilug.
King gilid da ring pilapil.
King kilub da ring playsdan.
Karing sasa, maglungga la ring ema
lalu na ring malutung matangal
ampo ring mangaragul a bulik.
Karing sasa, sasalilung la reng miyayaliwang ayup
antimo reng uwis, tika, maria kapra, kanugtug,
bako bengi, tikling, kanisig, talamuri, pasdal,
pasawa, pipit, denas, baka-baka, batu-batu,
sibad, bulan dagat, pariuk-pariuk, silin-silinan,
tarat, tankiring, peskarul, kandungango,
sabukut at dumara.
Karing sasa, marakal a talangka, damuku,
gurumeti, lukban, parus-parus at tugak.
Atin dagis malutu, barak, timbambarak,
palaspas, bitin kamamalu, at kanunugak.
Atin mu namang tutubung balanggut, tike, dalwari,
lagulu, bako, at saka palapat ampong water lily.
Nung ring sasa
sangtuaryu la karing ayup ampon asan
santungan na noman ning tau ring sasa
king aldoldo pangabiyayan.
Liban keni,
marakal ku abalung miyayaliwang pamanyakap asan,
antimo reng patukba, paluwe, paduwas, kitang, pintul,
panti, sakag, salap, bukatut, dala, salakab, pasabal,
baklad, galadgad, kubkub, bunbun, biyakus, iskrin.
Kareni makakwa
o mararakap la reng bulig, bundaki, biya
(biyang puti, bakuling, kuwayan, bangenge)
palus, igat, talunasan, kanduli, itu, tilapia,
ema, alimasad, bangus, talangka,
paro (buntukin, dapil, suwai, alamang,
sugpu, salamantorak, ulang)
dulum, likauk, suluwi, pingo, karpa,
samaral, liwalu, sapsap, badbad,
karag, ampo na reng gurami,
malibasan, kalibukab, balulungi.
Ibalik ku karing sasa,
aku medagul ku
libutad ning kabiyayan
manibat karela.
King gulut bale,
sasa lang mangatas
ampon mangaragul.
Mapilan karing panagdag b'ye
manibat king sasa ilapin deni:
ing mayumung tuba king tukil,
ing aslam king tapayan,
ing tulud a banus suman,
ing pinaud a panatap bubungan,
ing pamalis tingting,
ing panangab ibat keng palapang,
ing manyaman a bunga sasang
linutu king arnibal ating
mabanglung bulung pandan
at ing bunut butakal
a panisis dalig,
eran ampon kuran.
Ing b'ye ku mebiasa ya't minasa
libutad palibut ning amanung sasa.
Aku ing anak Sasa-muan.
Aku ing Bunga Sasa.
Tony Mercado Peña
nombresin |
