“Magkanta Tamu Pu” August 29, 2006
Posted by anak in Mar Franco.add a comment
Mamulosa Tamu Pu
Kadwa nang agpang Ning Biseru
E ku pu abatang e na magpang myuman
Pablasang manyaman ining pisasabyan
Panupaya yu pu’t e apalabasnan
Suglungan ke’ing kanta tamung pisusuluan
Ining Mang Renato ikwa nang kinabsi
King lepirut tuyu at mapaling nasi
Nining Mamang Paing matindi taliri
E mu pamangulis pati pamangati
Lawen yu ikit ne ing kakung sikretu
Buri kung kakanan neng ati ku kubu
Metung nang gelingan keyang pamamistu
Kabud linele ya’t sinigi ‘gyang kenu
Anya kapatad Tec mimingat ka wali
Ustung I Mang Paing linapit yang dili
Antabayanan mu potang bandang tauli
Gilis nang larawan ning lupa mu mayli
Ining Mang Renato asaglawe na la
Miyaliwang bage gamit king hacienda
Ating dangwe kwayan gamit king asikan
Batung piyangusan gamit king sakulan
Iyang dangwe kwayan agyang dikut ya mu
Marakal ya gamit kareng ortelanu
Malyaring panagle apalya at opu
Malyaring pamakud panyaplit biseru
At nung bangalan me at saka pukpukan
Malyaring ilubid bilang piguyuran
Karetang garosang panyaka keng daran
At plasigang paud garetang gulyutan
Ing manyaman diling gamit na ning dangwe
Yapin ing panyaplit kareng magbangenge
O kareng baintau a masasalbayi
At alang pakundang karetang babayi
Ing batung pyangusan dakal ya rin gamit
Kareng court basketbol malyaring pamitpit
Ketang pun nang posti ban yang e talindik
Potang ‘tin mamyalung at manulung kaynip
Ing masanting dili karetang gamit na
Nyang pyangusan batu ing maging siduan ya
Keng libutad ning ardin ning malagung rosa
At padurutnan ding myaliwang sampaga
Ay tuknangan ke pa ining kakung kanta
Pota nukarin pa miras mipabanda
Ining pisasabyan a misasangkutsa
Pota sumawa la ding maldang babasa
“Magkanta Tamu Pu” August 29, 2006
Posted by anak in Rafael Maniago.add a comment
“Magkanta Tamu Pu”
neng Paing
Makarine yata neng mapag naku man,
Kabang ding aliwa ela pa miralan;
Sige, bahala na kaku nang kapalan,
Ini nang lupa ku basta Kapampangan!
Makisulu ku pa king kekayug dulang,
At makisiping ku Kampeon Kapampangan!
Ba na kung lalu pang mabiasa keraklan,
Galing nang Atching Tec bakung miyabuban!
King kalat ning tuyu obat ne kanyaman.
Aliwa ya lasa ketang amun naman;
Potang misubu ya misamutang aslam,
Ala yang kaparis king keang linamnam!
Anya naman pala ing matikding Kang Mar,
Neng mamulosa ya masikan ya andar
Ganadu yang mengan king tuyung manangnang,
Balu ku ne “secret” ning kayang gelingan.
Ali mo?, balu ku atin nang kakayat,
King labi na mismu ing wawa mangislap;
I Kakang Renato tatanud makarap,
King dulang ning watas ding bersung maninap!
Gumato ta na pin king bigang maputi,
Potang bilyanan no kwerdas ning kudyapi;
Balang akalbit na, lantik ding taliri,
Pagtumayla naka diwang makawili.
Misaglulu ta pu kaniting pulosa,
Makisulu ta na king dulang a mana;
Karing nunu tamu keta pang minuna,
Ing AMANUNG SISUAN pane tayang dala!
“MAGKANTA TAMU PU” August 29, 2006
Posted by anak in Tec Sanchez-Tolosa.add a comment
“MAGKANTA TAMU PU”
Pulosa neng Tec Sanchez-Tolosa
Mikakunu ku man makiyabe-abe
Karening amanung minunang ginale
Ding kekatang koya a mapanantabe
Kening pakirasan tagimpan nining bie
Eku na abata ing e manambula
Kening pulosa tang sana pa kumaba
Pagdamutan yu pu ing kakung siwala
At dening ayampang ning simple kung diwa
Pakialtawan ya ing amanung sisuan
Etaya paburen kabud mitambunan
Sesen yang masampat para king daratang
A henerasyon pa dening kayanakan
Matikding gelingan dening mengauna
Kayabe gagalang, tutung mekilala
I Mamang RBA matikding poeta
Ampo i Mang Paeng ketang pangamat na
I Mamang Pidung pu, i Mamang Ernie T.,
I Mamang EBS, ampo i Cong Tony
E manamdaman sa’ reng eku adugsung
Eko man abanggit, sige’ng misanmetung
Balamu saligsig, mamagus dili na
Potang manakit yang tulung kalupa na
Tambing misalapi, sukat lang mikalma
Malati nang agus, o dagul nang bigla!
Maina man ing s’wala nining balang metung
Keng umpukan tamung tutung misusulung
Nung misaup-saup dakal apisukung
Kasala pin yata itang paintungul
Emu para kaku, emu para keka
Nune kening balen a tune tang sinta
Inia sa kapatad, pakirasan taya
Luid ya’ing Amanu at ining pulosa!
Panyalubung kang Mang Paeng August 29, 2006
Posted by anak in Mar Franco.add a comment
Panyalubung kang Mang Paeng
Agpang ning Biseru
Mar M. Franco
Tara na kabalen salubungan taya
Keng kayang panyatang ing suging poeta
Keng gulut nang Mang Rey tara tuki tana
At layun tang ibie masuyung alala
Tutu yang masampat ing pamitambayan
Lalu’t ing layun na masanting karasnan
Yapin ing magluid ya ing amanung sisuan
Ban e re kalingwan maldang Kapampangan
Nan ku mang tingiran keng pamiyadwangan
Nanu mang mabayat pilmi yang kakayan
Lalu’t balang metung tula rang iyampang
Ing anggang agyu ra at anggang sikanan
Antimo’y Mang Paing ‘gyang bayu yang gising
Agad yang minatba ketang pamaglambing
Nining Mang Renatong poetang maningning
Ban sablang mamasa atin lang pagmayring
Tune yang masampat kakatlu nang bosis
Uling ing pulosa mi-ganap ya sunis
Antimong lagusgus ning agus ning batis
Neng malalam bengi keta king dalisdis
Tara na kabalen ibie ta ing suyu
Kening amanu tang buri dang igupu
Pakapalian taya ing kekatang salu
Gisingan ta’ing lugud metudtud king pusu
Koyang Arnold, Tony, Pidung, John at Rolly
Atsing Aida, Helen, Blanca, Jane at Nancy
Ariel, Otel at Tec kekong sablang wali
Pakisabing mayap agpangan yu ne’y ni
Ikong mesambitlang kabalen katotu
E nako payata manatba na kayu
Ban e ya maputut ing pulosa tamu
Keko neng suglungan ining tauling bersu
*****************************************
“Magkanta Tamu Pu” August 27, 2006
Posted by anak in Rafael Maniago.add a comment
“Magkanta Tamu Pu”
neng RDM
Dakal a salamat, o Kakang RBA,
King pasalubung mung pulosa mu O”K;
Nanung iyatba ku, nanu mong kakung “say”,
Nune pa-”thank you” ku, “I may be in your way”.
Manatras ku dila, mangalgal ku bosis,
Manga pa-yatras la, ring takbang ding bitis.
Neng ikang karap ku, pulosa mung sunis,
Ala kung ayagpang, bisa kung mulandit!
Eku man mitakas, yakung mesaluput,
Karing amanu mu, eku misalikut;
Nanu mong yapse ku, eku biyasang damput,
Salitang malalam o masalimuyut.
Malaus naku pa, king bisni mung pasbul,
Makatiwangwang ya, a kaku miyukul;
Basta’t Kapampangan eta pu kukurul,
Tara na kapatad arapan ta’yng atul.
Ining pulosa ku, keka ya naman mo,
O matikding Ka Mar, e naka biseru;
Kalakyan na ka pin, sikanan mu todu,
Ining ka-kuyug mu, manyad yang saklolu!
Papiglo ku naman, Tony, Pidung, Rolly,
Arnold, John, Tec, Monette, Jane, Helen at Nancy.
Leng, Joyce, Ariel, Otel, Blanka at I Sally,
Iko ngan, ita ngan, alang papayali!
Mamupus na ku pu, kening pulosa ku,
Ining inapag nang RBA kanaku;
Matba ko pu sana, kekata ya ngan pu,
I Mang Ernie pala, yang peka uradu.
Panyalubung kang Kang Paeng August 27, 2006
Posted by anak in Renato B. Alzadon.add a comment
Panyalubung kang Kang Paeng
Pulosa neng RBA
Mekeni kabalen ibie tang alala
kening Kakang Paeng dinatang ne pala
manimuna nako a pupugue kaya
masayang panyatang komusta ka, koya.
Aro kasampat na bosis kang pangatlu
kening kekatamong malating basultu,
makanyan yang saslag ing amanu tamu
king pamiagpangan ding kekatang bersu.
Ngana ning kasebyan matibe yang lubid
ustung pengatlwan ya king pangapalipit
kalupa ning kanta malambing ya sunis
ustung mikatlwan ya keng tersera bosis.
Ngaku wari kaka king buri kung sabyan
aro kasanting na ning pamitambayan
ngeni nung burian mo kekayang ganapan
ining pulosa ko king amanung sisuan.
Ay balu ku kaka, bisa kang painawa
king pamagbyahi mo ibat king Pampanga
pakisabi ku mung kagising mu sana
antabayanan me ing kakung pulosa.
Sabik na keng tutu karing amanu mo
nanu mang salitang matulang ibie mo,
inia sana kaka, ipanupaya mo
dinan mu ke sana karing pulosa mo.
**************************
“MAKANYAN ING DAPAT” August 26, 2006
Posted by anak in Rafael Maniago.1 comment so far
“MAKANYAN ING DAPAT”
Basultu neng Rafael Maniago
1.
Makanyan ing dapat anya migaga la,
Pilit dang pag-babon ing lugud da kea;
Bosis dang mangatas anting babo banwa!
Malablab a lugud king balang pamilya.
King kakulangan na karelang kabyayan,
Pagsubuk ning balang aldo miraralan;
Lalu ya mung lalu lugud misusukdan,
Nung ninu ing tapat balang kemetungan.
King balang penandit karelang pisulwan,
Abitasa la rin ing dapat dang gawan;
Kilub ning pamilya pibule-bulayan,
Asalese da rin anggang katatawlian.
2.
King pamigaga ra retang pulitiku,
Buri dang resolba prolema aldol ‘do;
E malyari dapat tuki-tuki namu,
Kailangan mitulid nanu mang e-ustu!
King keralang dapat a pamangalamus,
Dakal a memalen king balang mikabus;
Agpang king istorya ning Baleng tibubus
Mididinang lunas tawling pamiyutus.
3.
Dakal nong bayani king dalan mibulang!
Mig-bwis daya ketang balen tang danupan.
Karin Kastila man ikwa tamung milwal,
Ikwa tang mekalag king karsel a bakal!
Ing lorung manalbe king meto-balayan,
Pelakpak nong bagyus keang atangalan;
Balang Pilipinu karelang tepangan!
Angga king meyakit ing tune kalayan!
Anya balang tau, pipiglas yang pilit,
Ba nang ayaktangan ing bie nang malupit.
Kapilan pa Balen nung alang tumulid?
King bie tang baluktut king pusu midukit!
Lihim Ning Pamanyulat Kung Poesia August 26, 2006
Posted by anak in Renato B. Alzadon.add a comment
Lihim Ning Pamanyulat Kung Poesia
Neng Renato B. Alzadon
Poeta Princepe/Poeta Laureado
Metung pung sankan na inya kaku mayan ing pamanyulat pu karing kawatasan, ya itang atin ku pung pamamaralan a pagpamye ku pu nung buri yeng kunan.
Ing paralan ku pung gagawang poesia, ya ing susulat keng balamu mo prosa. Inia, ing agus ning diwa yang kabas na yang agus ning batis kabang dudulung ya.
Menasa pu karing kanakung sinulat, subali karetang misulat nang malwat, makayan la pin pu pamilapatlapat. Inya, atmu no pu kalagwang misulat.
Pangilagan ku pu, nung agawa ku rin, itang magkulang la king pangatiririn. Kesa king dinan keng pasalungkit ing “tin”, bilugan ku ne pu king katayang “atin”.
Nung panuliran pu, ding kakung poesia prosa la pin tutu —atyu la keng rima. Metung pa, bistaman prosa lang talaga, makasukad no man bilang deng silaba.
Inya kareta pung mangutang nung nanu ing tagle nang birtud ning plumang talan ku, oyan pu, ya pin yan ing kakung sekretu a pagpamye libri kareng kabalen ku.
Ngening balu yune at lubus atalus ing lihim ning rimang pane-pane agus, agkatan da ko pu, tuki kong tagusgus king batis ning diwang mapinu lagusgus…!
*********************************************************
BAYAD YANG BUU August 26, 2006
Posted by anak in Mar Franco.add a comment
BAYAD YANG BUU
Mar M. Franco
Ating metung a baintaung malapit na mung mayari
keng pagaralan nang kursu, at uling atinan o
maki-agyu ya ing karelang pamilya kompyansa yang
nanu man ing pamitan nang regalu kang Tata na agyu
nang ibie niti kaya. Anya kabud misabi lang mitata
sinabi na at pemitan ing buri nang regalu pablasang
malyari neng ipagmaragul ning kayang Tata uling
mayari ya keng kursu na bilang “cumlaude”. Ing buri
nang regalu metung yang masanting a kotsi a pane
nang lalawen neng lalabas ya ketang “car dealer”
neng maglakad yang papunta keng koleyung pipagaralan
na.
Kabang lalapit ing aldo ning pamagyari na, ing
baintau magumasid ya keng galo nang Tata na at
manintun yang sinyalis nung seli na ne ing pamitan
nang regalu. Anyang miras ing abak ning kayaldon
ning “graduation ceremony” ing Tata inaus ne ing
baintau keng silid a nung nukarin ya madalas
mamasang libru. Ing Tata ngana, “Buri kung abalu mu
ing kaluguran daka at eku balu nung nu anti ing
binye mung kuswelu kanaku bilang biasa at mapinu
ugaling penganak at uli na niti pagmaragul daka”.
Kaibat nang sinabi iti inabut ne ning Tata king
baintau ing masanting a pangabalut a kahun regalu.
Bistaman medyu meyala yang gana ing baintau king
tinggap nang regalu, agad neng biklat at mamirapal
neng pengisi ing masanting a pangabalut a kahun at
ikit na ing laman na metung yang masanting a libru a
“leather bound”. Kabud abitasa na iti, mimua yang
sinumbat keng Tata na at ngana, “Keng karakal yu
kwalta, libru yamu ing regalu yu kanako?” kaibat
piragli neng meko at likwan ne ing regalu.
Milabas ing mapilan banwa, ing baintau meging
matagumpe ya keng pamagnegosyo keng marayung lugal.
Mikamasanting yang bale, miyaliwang modelung kotsi
at masayang pamilya. Bistaman sagana ya keng
miyaliwang bage asasali na ning kwalta, balamu atin
pa mu rin kulang keng bie na at e kumpletu ing saya
na. Kanyan ne aganaka ing kayang Tata a e na pa ikit
pasibayu manibat anyang mayari yang koleyu. Dapot,
bayu na pa alingunan ing pamanuli na, tinanggap yang
telegramang mamalitang ing Tata na mete ne at
kailangan nang muling agad uling pepamana na ngan
kaya ing melakwan a pibandian.
Karatang na king bale nang Tata na, lalu yang
melungkut uling aganaka na ing tauli rang pisabing
mitata e masanting. Milukuban yang lungkut ing
pilubluban na kabud aisip na ing gewa nang pamanabug
at pamagdabug kang Tata na. Piragli nang pengalkal
ing gamit at miyaliwang papeles nang Tata na ketang
silid nang pipamasan at karin ikit ne ing bayung
librung kinatmu nang alikabuk a makabili king babo
lamesa nung makananu neng likwan kanitang tebugan ne
ing Tata na. Kabang kikiak ya, biklat ne ing libru
at memasa ya. Anyang maglipat yang bulung keng
pamamasa na, menabu ya ing susi ning kotsi keng
sobring makapakat keng tauli nang bulung ning libru.
Ing sobri atin yang lagyu ning “car dealer” a nung
nukarin ne madalas sisilipan itang pagnasan nang
kotsi kanitang bayu ing pamagyari nang koleyu. Ing
tatak ning sobring dukanan ning susi makasulat ing
aldo ning kayang pamagyari at ing katayang “PAID IN
FULL”
PIBULEBULAYAN:
Bilang penganak a maniwalang atin Mayupayang
Guinung Miglalang keng sabla, ing kutang kekatamu
kapatad… makatapilan ukdu tayang akakalingwan ing
Mayupaya uling deng grasyang pangadian tamu Kaya e
Na la babie kekatamu keng itsura o pangabalut nung
makananu tala buring tanggapan?
Anya Kakanyan La August 25, 2006
Posted by anak in Mar Franco.add a comment
Anya Kakanyan La
Neng Mar Franco
Aug 25, 2006
1.
Nya migagaga la detang miyasawa
Ing pali dang buntuk e ra ayagwanta
Lalaking dusupil pilit manintun ya
Nung nanung apangan keng babo lamesa
Dapot ing babai ala yang ayampang
Agya sang nasi mu keng babo ning dulang
Uling ing lalaki ala yang intregang
Ditak mu man kwaltang panyaling pamangan
Aldoldo ning bie ra pane kabuysitan
Almusal, paugtuan angga nang apunan
Ing pisusuluan da purus kabugnutan
Karas na ning bengi kawani pagkeran
2.
Nya migagaga la detang politiko
Mipamasibas lang burak ampong kanyo
Pididibatian da nung ninung menako
Uling alang yari karetang proyekto
Keng alang patugut pamipangalamus
Kalulung memalen keng buntuk gagamus
Ala lang akakit kapilan mikabus
Ketang kabilyan dang mangaplas a dungus
Ustung deng memalen e da asukmaman
Ing daranasan dang pane nang danupan
At deng politiko daragul la atyan
Libutad na la ren gulisak king dalan
3.
Tutung makarine potang itang tau
Ugaling animal ing papakit tamu
Ala tang keliwan kareng pusa’t asu
Agyang alang sangkan mibubungil tamu
Nung bakit ing tau makanyan ya asal
Alang pamyaliwa karetang animal
Uli na ning IMBUT at DIRYAng mimiral
Ing nanu mang bage magi yang makamal
