jump to navigation

Nanu Ya’ing Katutuan? August 6, 2006

Posted by anak in Mar Franco.
trackback

Nanu Ya’ing Katutuan?

  Neng: Mar M. Franco
  July 28, 2006
 
  Nanu ing katutuan?
  Ing katutuan ya ing simbitlan king labi
  Pengisnawan saldak ning salung mapali
  Bunga ning sukal lub ning pusung mesawi
 
  Nanu ing katutuan?
  Ing katutuan ya ing kakung aralanan
  Maki tula’t lungkut ampong kasakitan
  Atin mu ring lugud ampon kapasnawan
 
  Nanu ing katutuan?
  Ing katutuan ya ing atin aldo saslag
  Sumangid ning lulam o uran babalag
  Kaibat na ning bengi pasala keng munag
 
  Nanu ing katutuan?
  Ing katutuan ya ing kinumit kung sala
  Sasaryan o ali keng kakung kapara
  Pigsisian ku’t ali ing Dios balu na’ita
 
  Nanu ing katutuan?
  Ing katutuan ya ing dakal bage-bage
  Kekata daratang e ta male-male
  Tanggapan ta’t ali keng kekatamung bie
 
  Nanu ing katutuan?
  Ing katutuan ya ing ‘tin e pamipante
  ‘tin pakakalulu at atin mabandi
  ‘tin ditak akumit ‘tin dakal adake
 
  Nanu ing katutuan?
  Ing katutuan ya ing dakal kule layi
  atin kayumangi, matuling, maputi
  at ing balang kule myaliwa lang sapni
 
  Nanu ing katutuan?
  Ing katutuan ya ing gigising kanaku
  At babie sikanan kareng balang aldo
  Yang pwersang tutulak ban tikdo ku’t kiso
 
  Nanu ing katutuan?
  Ing katutuan ya ing kanakung daraptan
  Keng pamangabyayan keng aldo daralan
  Ya ing pangimut ku a kekang umasdan

Comments»

No comments yet — be the first.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: