DENG BALEN A KAPAMPANGAN

DENG BALEN A KAPAMPANGAN
lyrics by Ernie C. Turla

(tune: Totoy Bato’s “Macalunus-lunus” or any basulto
tune,incl. Atin Cu Pung Singsing, Aniang Malati Cu)

Maluat ta nong buring / myuman apasialan
Deng anggang sacup ning / labuad Capampangan
Ania ngeni-ngeni / ing quecatang gawan
Saque tang Victory / libutan tala ngan.

Magumpisa tamu / qng balen ning Sexmoan
Carin qng paroba, / busal ning cailugan
Carin la macucua / reng dacal a asan
Picabaluan yaiti / careng cayang plaisdan.

Dalaquit tang aduang / ilug qng albugan
Ing balen ning Lubao / ya’ing quecatang dasnan
Quen ne mang atbu’iti / at palayan dacal
Carin ya misapuac / Dadong Macapagal.

Magpasulung tamu / banda paralaya
Ing dasnan tang balen / ing masayang Guagua
Carin ya tubu ing / prumerung cardinal
Y Rufino Santos / obispung marangal.

Artistang Rogelio / idolo ring malda
At Gloria Arroyo – anac no ning Baba;
Yuzon, Tolentino – poetang balita
At Senador Puyat – tubu la ngan Wawa.

Calagpas ta Betis / miras ta Bacolor
Balen de reng watas / a matas a balor
Crisostomo Soto / at Felix Galura
Ila ring taniag nang / poetang macudta.

Ing Baculud ya ing / Athens ning Pampanga
Ing minunang diling / “trade school” carin ya
Meguing capital ne / ning quecatang bansa
Iniang simsam de reng / British ing Menila.

Ing tutuquing balen / ya ing San Fernando
Ya ing capital na / ning probincia tamu
Meguing capital nia / namang Aguinaldu
Caibat ning Malolos – bigsac ding ‘Mercanu.

Ciudad San Fernando / sicat ya neng Pascu
Uling deng parul nang / pasigla queng yatu
At ustung Maleldo / ya ing cabalitan
Careng papapacu / queng curus mu naman.

Balian ne ning martir / Jose Abad Santus
Lugud na queng bansa / daya na minagus
Balian ne ning central – ya ing Pasudeco
Gagawang asucal / neng aldo cacabio.

Magbanda tang wanan / banda qng aslagan
Balen Santo Tomas / quecatang labasnan
Dasnan yang Apalit / carin ya’ing Sulipan
Ya ing cucina ning / lutung Kapampangan.

Magpabalag tamu / banda qng mauli
Miras ta Masantol / at qng Macabebe
Pugad do reng dacal / diling beteranu
Na ning America – detang pensionadu.

Lahi lang matapang / matun queng labanan
Ilang pengara ra / ri Raha Soliman
At careng Castila / macanian mu naman
Pequiguera rala / isla cabilugan.

Magbalic ta ngeni / papunta qng babo:
Minalin, San Simon / San Luis at Mexico
Iti lugal de ri / Luis Taruc at Hizon
Metung a heneral / na ning rebolucion.

Caibat ing Sta. Ana / cambe ning Arayat
Calele ning bunduc / taniag queng alamat
Catalindiquingan / ya pin ing Candaba
Balian nang Gallardo / sicat a poeta.

Ngeni lundag tamung / marayung-marayu
Dane ning Zambales / Bunduc Pinatubu
Baryu Sta. Cruz / lunsut ta Florida
E la micanlaut / balen Sta. Rita.

Carin ya ing Basa / papunta qng Porac
Sumulung tang maluat / at miras ta qng Clark
Air Base ne canita / bansang America
Dapot ngeni naman / “economic zone” ya.

Sulapo tang norte / ing Tarlac yang dasnan
Peca pangulu ning / labuad Kapampangan
Carin ya ing taniag / Hacienda Luisita
Anti murin ing park / nang Maria Cristina.

Magpabalag tamung / patililis canu
Miras ta Concepcion / balen nang Aquino
Lumipat tang ilug / miras ta Magalang
Sale ring poetang / misna qng guelingan

Sumulung tang wanan / layun tayang dasnan
Ciudad ning Angeles / centru ning cabiasnan
Sandalan ding pantas / pugad ning casayan,
Taguimpan ne ngeni / ning balen tang tibuan!

Magbalic tang norte / Dau, yang tuntunan
Mabalacat na iti / at caibat na’ing Bamban
Calagpas ta carin / ing Capas yang dasnan
Carin ya’ing O’Donnel / “Death March” cayangganan

Carin ya mibait / Renato Alzadon
Bantug nang poeta / ning Amanung Sisuan
Dala me queng prosa / dala me queng canta
Anting talasulat / easy-easy caya

Ya’ing dalo pandangal / ibat ya Maryland
Pagmaragul ta ing / cayang pamaniatang
Maldang maquiramdam / ana ticdo ta ngan
Pasaganan tayang / matning palacpacan!

Advertisements