jump to navigation

NUNG E NGENI, CAPILAN PA? August 29, 2006

Posted by anak in Edgardo Sale.
trackback

NUNG E NGENI, CAPILAN PA?
Neng Ed Bonus Sale

Andat lumwal cu queng bale balang abac
Pane cong acaquit deng salasalungat
A pacasimangut ca reng lele dalan
Balamu kitmu lang probelamg daralan

Aldodo gewa ning Guinung Mayupaya
Cacayud la queni cacayud la queta
Ding tau balamu mistulang maquina
Alus ala na lang ditac mang paynawa

Ramdam nung ramdam, tagalan pulayan
Ca reng balang metung alang pakyalaman
Ing dugang na ning bie durut alang tucnang
Maybug macalilyu keng isip neng minsan

Iting casaquitan capilan mapupus?
Capilan macalag gamat macagapus?
Nuca rin ta caya caniti papunta?
Capilan ta caya lubus mitimawa?

Napun casabi que y Paring Berto cu
Ing caisipan na mitmung sentimyentu
Queng pilubluban na e agyung tanggapan
Ing pangalaco na quetang pipagobran

Oyni ing matsura quetang cayang cuentu
Asawa licwan ne caya e cuntentu
Nung nanu ing sangcan ilang miquibalu
Balamu natural namu ca reng tau

Alang patugut ing cangye’t gulisacan
Queng mialiwaliwang tipun at aguman
Itang balang metung atin capanwalan
Ilang miquibalu quening tune dalan

Sumangid ning baryu atin miyasawa
Ing pangabyayan da ing bawal a droga
Bistaman e ustu iti daraptan da
Ban atin lang pacan quetang pamilya ra

Capilan ta caya mabulus micabus?
Caniting cabilian macalunus-lunus?
Ca reng daralanan aquit mung tibusbus
Dacal pa mu rin taung magpalimus

Iting cacaluluan quelat cabilugan
Bistaman macanyan ca cung paniwalan
Casalpantayanan e dapat calingwan
Micabus ta mu rin quening casaquitan

Mitmu yang misteryu ing bie daralanan
Dapot nung matibe’ing casalpantayanan
Quetang sepu na ning quecaba ning dalan
Atin ca pa mu rin mayap a carasnan

Salamat na rugu neng muli cu bale
Canacu atin pa mu rin manantabe
Atin man o alang pasalubung bage
Careng pamilya cu lugud da ramdam que

Nanu man balacan o bage parasan
E mu na panayan guintung caorasan
Ing daratang aldo e me panayan pa
Umpisan me ” nung e ngeni capilan pa?

Comments»

1. Ryan Macatuno - November 21, 2008

Kasanting na pwede yapu kopyan ine?
Pasend pu king email ku nung ninuman ing atin kopya knini.
Dakal pung salamat.

2. Anonymous - November 21, 2008

LUID KECA RYAN MACATUNO,

Salamat naman a buryan me ing poesya. Nuca tau king Pampanga?

Mayap aldo keca,

Ed Bonus Sale

3. Julie Affinita - May 8, 2011

Kang Ed, Ayhh ginuko ikit la mu rin deng peosya yu. Kasanting da! Aku pu i Julie Lumanog Affinita. Mikit tana pu keng Facebook. Keng kakapaytun kung Literatura Kapampangan ikit kula deng marakal a peosya. Pota pung muli ku San Anton Guagua, oyni ing pa-contest ku kareng paunakan ko nung masanting lang magwikang kapampangan, siguradu yang manyambut i ima` ku uling tune ya pung kapampangan at mahilig keng peosyang kapampangan.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: